ఈ ఏడాది అధికమాసం.. తిరుమలలో రెండుసార్లు శ్రీవారి బ్రహ్మోత్సవాలు

తిరుమల శ్రీవారి భక్తులకు ఈ ఏడాది కనుల పండుగ కలగనుంది. అధికమాసం కారణంగా కలియుగ దైవం శ్రీ వేంకటేశ్వరస్వామి వారికి రెండుసార్లు బ్రహ్మోత్సవాలు జరగనున్నాయి. ఈ మేరకు తిరుమల తిరుపతి దేవస్థానం (టీటీడీ) బ్రహ్మోత్సవాల తేదీలను, పూర్తిస్థాయి వాహన సేవల వివరాలను అధికారికంగా ప్రకటించింది. దీంతో తిరుమల గిరులు గోవింద నామస్మరణతో మరోసారి మార్మోగనున్నాయి.

ఈ ఏడాది సెప్టెంబర్‌లో వార్షిక సాలకట్ల బ్రహ్మోత్సవాలు, ఆ తర్వాత అక్టోబర్‌లో నవరాత్రి బ్రహ్మోత్సవాలు నిర్వహించనున్నారు. సాధారణంగా తెలుగు పంచాంగం ప్రకారం అధికమాసం వచ్చిన సంవత్సరాల్లో శ్రీవారికి రెండు బ్రహ్మోత్సవాలు నిర్వహించడం ఆనవాయితీ. ఈ సంప్రదాయాన్ని అనుసరిస్తూ టీటీడీ ఈ ఉత్సవాలకు భారీ ఏర్పాట్లు చేస్తోంది.

మొదటగా, సెప్టెంబర్ 15 నుంచి 23వ తేదీ వరకు తొమ్మిది రోజుల పాటు నవాహ్నిక సాలకట్ల బ్రహ్మోత్సవాలు అత్యంత వైభవంగా జరగనున్నాయి. దీనికి సెప్టెంబర్ 14వ తేదీ సాయంత్రం శాస్త్రోక్తంగా అంకురార్పణ కార్యక్రమం నిర్వహిస్తారు. బ్రహ్మోత్సవాల సమయంలో ప్రతిరోజూ ఉదయం 8 నుంచి 10 గంటల వరకు, రాత్రి 7 నుంచి 9 గంటల వరకు స్వామివారు వివిధ వాహనాలపై తిరుమాడ వీధుల్లో విహరించి భక్తులను కటాక్షించనున్నారు.

సాలకట్ల బ్రహ్మోత్సవాల వాహన సేవల పూర్తి షెడ్యూల్:

సెప్టెంబర్ 15 (మొదటి రోజు): సాయంత్రం ధ్వజారోహణం, రాత్రి 9 గంటలకు పెద్ద శేష వాహనం. 
సెప్టెంబర్ 16 (రెండో రోజు): ఉదయం చిన్న శేష వాహనం, రాత్రి హంస వాహనం.
 సెప్టెంబర్ 17 (మూడో రోజు): ఉదయం సింహ వాహనం, రాత్రి ముత్యపు పందిరి వాహనం. 
సెప్టెంబర్ 18 (నాలుగో రోజు): ఉదయం కల్పవృక్ష వాహనం, రాత్రి సర్వభూపాల వాహనం. 
సెప్టెంబర్ 19 (ఐదో రోజు): ఉదయం మోహినీ అవతారం, రాత్రి గరుడ వాహన సేవ (సాయంత్రం 6:30 నుంచి రాత్రి 11:30 వరకు).
 సెప్టెంబర్ 20 (ఆరో రోజు): ఉదయం హనుమంత వాహనం, సాయంత్రం స్వర్ణ రథం, రాత్రి గజ వాహనం. 
సెప్టెంబర్ 21 (ఏడో రోజు): ఉదయం సూర్యప్రభ వాహనం, రాత్రి చంద్రప్రభ వాహనం.
సెప్టెంబర్ 22 (ఎనిమిదో రోజు): ఉదయం 7 గంటలకు రథోత్సవం (మహారథం), రాత్రి అశ్వ వాహనం. 
సెప్టెంబర్ 23 (తొమ్మిదో రోజు): ఉదయం 6 నుంచి 9 గంటల వరకు చక్రస్నానం, రాత్రి ధ్వజావరోహణంతో ఉత్సవాలు ముగుస్తాయి.

ఈ సాలకట్ల బ్రహ్మోత్సవాలు ముగిసిన తర్వాత, అక్టోబర్ 12 నుంచి 20వ తేదీ వరకు నవరాత్రి బ్రహ్మోత్సవాలను కూడా టీటీడీ నిర్వహించనుంది. ఈ వివరాలను టీటీడీ ముఖ్య ప్రజాసంబంధాల అధికారి కార్యాలయం ఒక ప్రకటనలో తెలియజేసింది. ఈ రెండు బ్రహ్మోత్సవాల సందర్భంగా లక్షలాదిగా భక్తులు తిరుమలకు తరలివచ్చే అవకాశం ఉండటంతో టీటీడీ అన్ని రకాల ఏర్పాట్లను పకడ్బందీగా చేస్తోంది.